හොලිවුඩයේ දැවැන්ත චිත්‍රපට නිෂ්පාදන සමාගමක් වන ලයන්ස්ගේට් (Lionsgate), ඉන්දීය සිනමාවේ ජනප්‍රිය ක්‍රියාදාම නළු යෂ් සමඟ විශේෂ ගිවිසුමකට එළඹ තිබෙනවා. මේ ගිවිසුම හරහා ලයන්ස්ගේට් සමාගමේ ඉදිරි චිත්‍රපට ප්‍රවර්ධනය කිරීමේ කටයුතු සඳහා යෂ් සහ ඔහුගේ ‘මොන්ස්ටර් මයින්ඩ් ක්‍රියේෂන්ස්’ නිෂ්පාදන ආයතනය දායක වෙන්න නියමිතයි. විශේෂයෙන්ම ‘ජෝන් වික්’ චිත්‍රපට මාලාවේ එන ‘කේන්’ වැනි දැවැන්ත නිර්මාණ ඉන්දියාවේ සහ ලොව පුරා සිටින රසිකයන් අතරට ගෙන යාම මෙහි ප්‍රධාන අරමුණයි. යෂ්ට සමාජ මාධ්‍ය ඔස්සේ මිලියන 25කට අධික රසික පිරිසක් සිටින නිසා, මෙම හවුල්කාරිත්වය ලයන්ස්ගේට් සමාගමට විශාල ශක්තියක් වනු ඇති බවයි වාර්තා වෙන්නේ.
ඉන්දියාවේ සිනමා වෙළඳපොළ ලෝකයේ වේගයෙන්ම වර්ධනය වන වෙළඳපොළක් බව ලයන්ස්ගේට් සමාගමේ සභාපති ඇඩම් ෆොගල්සන් පවසනවා. යෂ්ගේ නිර්මාණාත්මක දැක්ම සහ ඔහුගේ ජනප්‍රියත්වය නිසා ඉන්දීය ප්‍රේක්ෂකයන් සමඟ වඩාත් සමීපව කටයුතු කිරීමට ඔවුන්ට හැකි වෙනවා. මේ අතර, යෂ් රංගනයෙන් දායක වන ‘ටොක්සික්: අ ෆෙයාර්ටේල් ෆෝ ග්‍රෝන්-අප්ස්’ (Toxic: A Fairytale for Grown-Ups) චිත්‍රපටය අගෝස්තු 26 වැනිදා ලොව පුරා තිරගත වීමට නියමිතයි. මෙම චිත්‍රපටයේ ක්‍රියාදාම දර්ශන නිර්මාණය කර තිබෙන්නේ ‘ජෝන් වික්’ සහ ‘ෆාස්ට් ඇන්ඩ් ෆියුරියස්’ වැනි චිත්‍රපටවලට දායක වූ ජේ.ජේ. පෙරී විසින්. ඉදිරියේදී යෂ්ගේ රංගනයෙන් හැඩවෙන ‘රාමායණ’ චිත්‍රපටයත් නොවැම්බර් මාසයේදී ලොව පුරා ප්‍රදර්ශනය වීමට නියමිත නිසා, යෂ්ගේ රසිකයන්ට ඉදිරියේදී විශිෂ්ට සිනමා අත්දැකීම් රැසක් බලාගන්න පුළුවන් වේවි.
Discussion & Feedback