ඇමරිකානු ජනාධිපති ඩොනල්ඩ් ට්‍රම්ප් විසින් සී.එන්.එන් (CNN), එම්.එස්.නව් (MS Now) සහ පොලිටිකෝ වැනි ප්‍රධාන පෙළේ මාධ්‍ය ආයතන කිහිපයකට ධවල මන්දිරයට ඇතුළුවීම තහනම් කර තිබෙනවා. තමන්ට එරෙහිව අසත්‍ය ප්‍රවෘත්ති වාර්තා කරන බව පවසමින් ට්‍රම්ප් මෙම තීරණය ගෙන ඇත්තේ සිය ටෘත් සෝෂල් (Truth Social) ගිණුම හරහායි. තවත් මාධ්‍ය ආයතන කිහිපයකටම ඉදිරියේදී මෙවැනිම තහනම් පැනවීමට ඉඩ ඇති බවත් ඔහු වැඩිදුරටත් අනතුරු අඟවා තිබෙනවා. කෙසේ වෙතත්, මෙම තහනම ප්‍රකාශයට පත් කළත්, අදාළ මාධ්‍ය ආයතනවල වාර්තාකරුවන් තවමත් ධවල මන්දිරය තුළ රාජකාරි කටයුතුවල නිරත වෙමින් සිටින බවයි වාර්තා වන්නේ.
මේ සම්බන්ධයෙන් මාධ්‍යවේදීන් ප්‍රශ්න කළ විට ට්‍රම්ප් පවසා සිටියේ මෙය කිසියම් විශේෂ සිදුවීමක් නිසා ගත් තීරණයක් නොව, පසුගිය වසර කිහිපය පුරාම එම ආයතන සිදු කළ වාර්තාකරණයන් නිසා ඇති වූ කලකිරීමක් බවයි. මීට පෙර සිය පළමු ධුර කාලයේදීත් ජිම් ඇකොස්ටා වැනි මාධ්‍යවේදීන්ගේ අවසර පත්‍ර අවලංගු කිරීමට ට්‍රම්ප් උත්සාහ කළත්, අධිකරණය හමුවේ ඔහුට එම නඩුව පරාජය වීමට සිදු වුණා. වත්මන් තත්ත්වය තුළ මෙම තහනම නීතිමය අභියෝගයකට ලක් වුවහොත් කුමක් සිදුවේද යන්න තවමත් පැහැදිලි නැහැ. කෙසේ වෙතත්, ට්‍රම්ප්ගේ මෙම ආඥාදායක ස්වභාවය සහ මාධ්‍ය නිදහසට එල්ල කරන බලපෑම් පිළිබඳව මේ වන විට දැඩි කතාබහක් ඇති වෙමින් පවතිනවා.
Discussion & Feedback