Apple TV ආයතනය මේ වසරේ අගභාගයේදී ප්‍රේක්ෂකයන්ව කුතුහලයෙන් ඇලලී යන අලුත්ම අපරාධ කතා මාලාවක් අරගෙන එන්න සූදානම් වෙනවා. ’12 12 12′ ලෙස නම් කර ඇති මෙම කතා මාලාව, ජනප්‍රිය ’24’ සහ ‘Money Heist’ යන කතා මාලාවල තිබෙන තියුණුම අංගයන් එකතු කරමින් නිර්මාණය කර තිබීම විශේෂත්වයක්. මෙහි ප්‍රධාන චරිත සඳහා හොලිවුඩයේ දැවැන්ත නළුවන් දෙපළක් වන ඇන්තනි මැකී සහ ජේමි ඩෝනන් රංගනයෙන් දායක වෙනවා. කතාව ගෙතෙන්නේ අපකීර්තියට පත් වූ FBI නිලධාරියෙක් සහ දක්ෂ අපරාධකරුවෙක් අතර සිදුවන බළල්-මී අරගලය වටායි. ස්විට්සර්ලන්තයේ සූරිච් නුවර පොළොව යට සැඟවුණු බැංකු සුරක්ෂිතාගාරයක් කොල්ලකෑමේ සැලසුමක් වටා මෙම කතාව ගොඩනැගෙන අතර, එය ඉතාම උද්වේගකර අත්දැකීමක් වේවි.
මෙම කතා මාලාව කොටස් අටකින් සමන්විත වන අතර, එහි පළමු කථාංග දෙක නොවැම්බර් 13 වැනිදා Apple TV ඔස්සේ විකාශය ආරම්භ කරනවා. ඉන්පසුව සෑම සතියකම එක් කථාංගයක් බැගින් නැරඹීමට අවස්ථාව ලැබෙනවා. Ted Lasso සහ Slow Horses වැනි ජනප්‍රිය කතා මාලාවලින් පසුව, Apple TV හි සාර්ථකත්වය තවත් ඉහළ නංවන්නට මෙම කතා මාලාවට හැකි වේවි කියලා තමයි බොහෝ දෙනා විශ්වාස කරන්නේ. Marvel චිත්‍රපටවලින් ඔබ්බට ගිය ඇන්තනි මැකීගේ රංගනය සහ ජේමි ඩෝනන්ගේ අපරාධකාරී චරිත නිරූපණය දකින්නට ලැබීම රසිකයන්ට ලැබෙන ලොකුම තෑග්ගක්. ඉතින්, ඔබත් මේ වගේ කුතුහලය පිරුණු අපරාධ කතා වලට කැමති නම්, නොවැම්බර් 13 වෙනිදා එනකම් නොඉවසිල්ලෙන් බලාගෙන ඉන්න පුළුවන්.
Discussion & Feedback