ලොවම මවිත කළ සොලෝ ලෙවලින්ග් ඇනිමෙ කතා මාලාව නැවතත් කරළියට

ලොව පුරා ඉමහත් ජනප්‍රියත්වයක් දිනාගත් ‘සොලෝ ලෙවලින්ග්’ (Solo Leveling) ඇනිමෙ කතා මාලාවේ රසිකයන්ට සතුටුදායක ආරංචියක් ලැබිලා තියෙනවා. දෙවන කතා සමය අවසන් වෙලා වසර දෙකකට පස්සේ, මේ කතා මාලාව නැවතත් තිරගත වෙන්න නියමිතයි. ඒත් මේ පාර එන්නේ තුන්වන කතා සමය නෙවෙයි, ‘Solo Leveling -Beyond the System-‘ නමින් අලුත්ම චිත්‍රපටයක්. මේ ගැන නිල වශයෙන් ප්‍රකාශ කරලා තියෙන්නේ ඇනිමෙ එක්ස්පෝ (Anime Expo) හරහායි. සුන් ජින්වූගේ රුව සහිත අලුත්ම පෝස්ටරයක් නිකුත් කරලා තියෙන අතර, ඒකේ තියෙන කළු-සුදු පසුබිම මැද ජින්වූගේ නිල් පැහැති ඇස පමණක් ඉස්මතු වෙලා පේනවා. මේකෙන් ජින්වූගේ ගමනේ අලුත්ම පරිච්ඡේදයක් ආරම්භ වෙන බව තමයි හැඟවෙන්නේ.

මේ චිත්‍රපටය නිෂ්පාදනය කරන්නේ කලින් වගේම A-1 Pictures ආයතනය විසින්. චිත්‍රපටයේ නිශ්චිත දිනයක් තවම ප්‍රකාශ කරලා නැති වුණත්, මේ ආරංචියත් එක්කම රසිකයන් අතර ලොකු උද්යෝගයක් ඇති වෙලා තියෙනවා. ඒ වගේම, D&C Media ආයතනය මගින් තහවුරු කරලා තියෙන විදියට, ‘සොලෝ ලෙවලින්ග්’ තුන්වන කතා සමය 2027 සහ 2028 අතර කාලයේදී බලාපොරොත්තු වෙන්න පුළුවන්. චිත්‍රපටය සහ තුන්වන කතා සමය අතර සම්බන්ධය කොහොම වෙයිද කියන එක ගැන තවම පැහැදිලි නැතත්, ජින්වූගේ මේ ගමන තවත් බොහෝ දුර යන බව නම් ස්ථිරයි. ඇනිමෙ ලෝලීන් මේ අලුත්ම වෙනස දෙස ඉතාමත් බලාපොරොත්තුවෙන් බලාගෙන ඉන්නවා.