පාපන්දු ලෝකයේ අමතක නොවන සිදුවීමක් වුණු 1986 ලෝක කුසලාන තරගාවලියේදී, ආජන්ටිනාවේ දියේගෝ මැරඩෝනා එංගලන්තයට එරෙහිව ‘දෙවියන්ගේ හස්තය’ ලෙස ප්රසිද්ධ වුණු එම මතභේදාත්මක ගෝලය ලබාගත්තේ මේ පන්දුවෙන්. එදා තරගයේදී පන්දුව අතින් ගසා ගෝලයක් ලබාගැනීම ගැන මැරඩෝනා පසුව පවසා තිබුණේ එය ‘ටිකක් මැරඩෝනාගේ හිසින් සහ ටිකක් දෙවියන්ගේ හස්තයෙන්’ සිදුවූවක් බවයි. මේ ඓතිහාසික පන්දුව පසුගියදා ඇමරිකාවේ පැවැති වෙන්දේසියකදී පවුම් මිලියන 2.5ක මුදලකට අලෙවි වී තිබෙනවා.
ඇත්තටම මේ පන්දුව මීට වඩා ඉහළ මිලකට අලෙවි වේවි කියලා බොහෝ දෙනෙක් බලාපොරොත්තු වුණත්, අවසානයේ එය අලෙවි වුණේ අපේක්ෂා කළ මිලට වඩා අඩුවෙන්. 1986 තරගය විනිශ්චය කළ ටියුනීසියානු ජාතික අලි බින් නසාර් මහතා දශක තුනකට වැඩි කාලයක් මේ පන්දුව තමන් ළඟ තබාගෙන සිටියා. පසුව 2022 වසරේදී ඔහු මෙය අලෙවි කළ අතර, ඉන්පසුව නැවතත් වෙන්දේසියට ඉදිරිපත් කළත් එය අලෙවි කරගැනීමට නොහැකි වුණා. කෙසේ වෙතත්, පාපන්දු ඉතිහාසයේ තිබෙන වටිනාම සහ සුවිශේෂීම භාණ්ඩයක් ලෙස මේ පන්දුව තවමත් සැලකෙනවා.
එම තරගයේදීම මැරඩෝනා එංගලන්ත ක්රීඩකයන් පස් දෙනෙකු පසුකරගෙන ගොස් ලබාගත් ‘සියවසේ හොඳම ගෝලය’ නිසාත් මේ තරගය ලෝක ප්රසිද්ධ වුණා. මීට පෙර එම තරගයේදී මැරඩෝනා ඇඳ සිටි කමිසය පවුම් මිලියන 7.1කට අලෙවි වී තිබීමෙන් පෙනෙන්නේ ඔහුගේ ක්රීඩා දිවියේ තිබූ වටිනාකම කොතරම්ද යන්නයි. මේ පන්දුව මිලදී ගත් නව හිමිකරු පිළිබඳව තවමත් වැඩි විස්තර අනාවරණය වී නැහැ.
Discussion & Feedback